Asko itxarondako inauteriak
Pandemiagatik bi urtez inauteriak ospatu gabe egon ondoren, otsailaren 18an, ostiralarekin, ospakizun honetaz gozatzeko aukera izan genuen berriro. Goizean, eskolan, haurrak mozorrotu egin ziren, eta kurtsoz kurtsoko koreografia egitera atera ziren jolastokira. Aurtengo gaiak honako hauek izan dira: Pitufoak, 101 Dalmata, Happy Feet, Errege lehoia, Trolls, Inside out, Bollywood, Karibeko piratak eta Harry Potter.
Arratsaldean, Apyma Zumediak antolatuta, txokolate jana eskaini zen Berdintasunaren plazan musikaz alaitua, eta ondoren haurren kalejira burutu zen San Juan plazaraino, Tipulina eta Tipulon lagun zutelarik. Bertan, Zo-Zongó!! Taldea eta bere Percu show KOLPEZ BLAI ikuskizuna txikien eta haien familien etorreraren zain zeuden.
Eguraldia lagun , arratsalde alai batez gozatzeko aukera izan genuen, familien borondatezko lankidetzari esker, jaia aurrera atera baitzen. Familien ardura izan zen bai mahaiak eta paperontziak muntatzea eta biltzea, bai 600 txokolate eta madalena baino gehiago banatzea.
Familia eta txikiek hainbeste itxarondako inauteriez gozatu ahal izan zuten, jai arratsalde horretan.